YOMU Project

អំពីគម្រោង “YOMU”

ក្នុងពេលមានការរាតត្បាតជំងឺកូវីដ-១៩ តើអ្នកនិពន្ធអាស៊ានមានគំនិតអ្វីខ្លះ ហើយពួកគេកំពុងសរសេរអំពីអ្វីនៅពេលដែលពិភពលោក និងជីវិតប្រចាំថ្ងៃរបស់យើងមានការផ្លាស់ប្តូរយ៉ាងខ្លាំងបែបនេះ? បច្ចុប្បន្នគម្រោងអក្សរសិល្ប៍អាស៊ាន “YOMU” (មានន័យថា “អាន”) កំពុងដំណើរការ ដោយបង្វែររឿងរ៉ាវនៃជីវិតប្រចាំថ្ងៃរបស់មនុស្សនៅអាស៊ី ដូចជា ភាពរីករាយ ភាពលំបាក និងភាពអត់ធ្មត់របស់ពួកគេ ទៅជាសាច់រឿង តាមការយល់ឃើញរបស់អ្នកនិពន្ធក្នុងប្រទេសនីមួយៗ។ ដោយសហការជាមួយអ្នកនិពន្ធដែលកំពុងលេចធ្លោនៅអាស៊ីអាគ្នេយ៍ និងឥណ្ឌា គម្រោងនេះនឹងបង្ហោះស្នាដៃអក្សរសិល្ប៍ថ្មីរបស់ពួកគេជាភាសាអង់គ្លេស ជប៉ុន និងភាសាជាតិរបស់ពួកគេផងដែរ។​ តើសកម្មភាពនៃការអាន បានផ្លាស់ប្តូរយ៉ាងណាខ្លះ នៅពេលដែលមធ្យោបាយសម្រាប់ទំនាក់ទំនងរបស់មនុស្ស មានកាន់តែច្រើនទៅៗ ឧទាហរណ៍ជាក់ស្តែងដូចជាកើនឡើងនូវការប្រើប្រាស់បណ្តាញសង្គមជាដើម? គម្រោងនេះក៏នឹងបង្ហាញរឿងរ៉ាវ និងរបាយការណ៍ស្តីពីភាពរឹងមាំ និងលក្ខណៈចម្រុះគ្នានៃ វប្បធម៌នៃការអានក្នុងប្រទេសនីមួយៗ ដែលឆ្លុះបញ្ចាំងអំពីស្ថានភាពសង្គម និងវប្បធម៌បច្ចុប្បន្ន។ សូមរីករាយក្នុងការស្វែងយល់អំពីអាស៊ីនាពេលបច្ចុប្បន្នតាមរយៈការអាន!  

អំពីគម្រោង “YOMU” ក្នុងប្រទេសកម្ពុជា

ក្នុងឆ្នាំ 2021 គម្រោង “YOMU” នៅកម្ពុជា នឹងពាំនាំមកនូវព្រឹត្តិការណ៍តូចៗជាច្រើនដែលមានគោលបំណងបង្ហាញពីរឿងរ៉ាវនៃជីវិតប្រចាំថ្ងៃរបស់ប្រជាជននៅអាស៊ី ភាពសប្បាយរីករាយ ភាពលំបាក និងភាពអត់ធ្មត់របស់ពួកគេ តាមការយល់ឃើញរបស់អ្នកនិពន្ធ ក៏ដូចជាការលើកកម្ពស់វប្បធម៌នៃការអាននៅក្នុងប្រទេសនីមួយៗផងដែរ។ គម្រោងនេះបានបង្កើតកម្មវិធីគោលសំខាន់ៗចំនួនពីរ៖ កម្មវិធីទីមួយគឺ “អក្សរសិល្ប៍” និងកម្មវិធីទីពីរគឺ “ការតាំងពិព័រណ៍ Manga ជប៉ុន” ដែលមានគោលបំណងអនុវត្តបេសកកម្មនៃគម្រោង “YOMU” ទាំងមូល។


1.កម្មវិធីអក្សរសិល្ប៍

YOMU Literature

កម្មវិធី «អក្សរសិល្ប៍» បានសហការជាមួយអ្នកនិពន្ធកម្ពុជាចំនួនបីរូប ដែលពោរពេញដោយទេពកោសល្យ ភាពល្បីល្បាញ និងមានការទទួលស្គាល់នៅក្នុងប្រទេសកម្ពុជា ដើម្បីសរសេរប្រលោមលោកខ្លីៗ។ តាមរយៈប្រលោមលោកខ្លីៗទាំងនោះនឹងឆ្លុះបញ្ចាំងឲ្យឃើញថា តើជំងឺកូវីដ-១៩ ធ្វើឲ្យមានការផ្លាស់ប្តូរបែបណាខ្លះនៅក្នុងសង្គម និងជីវិតប្រចាំថ្ងៃនៅក្នុងប្រទេសកម្ពុជា។

ប្រលោមលោក​ខ្លី​​នេះនឹង​ចុះ​ផ្សាយ​ជា​ភាសា​ខ្មែរ ជប៉ុន និង​អង់គ្លេស​នៅ​ពេល​ក្រោយនៅ​លើ​គេហទំព័ររបស់ការិយាល័យ​កណ្តាលនៃមជ្ឈមណ្ឌលអាស៊ី នៃមូលនិធិជប៉ុន (The Japan Foundation Asia Center)។ នៅមានព្រឹត្តិការណ៍ដ៏រំភើបមួយទៀតនោះគឺ បន្ទាប់ពីរឿងប្រលោមលោកខ្លីចំនួនបីរឿងនឹងត្រូវចេញផ្សាយហើយ ភាពយន្តខ្លីនឹងត្រូវផលិតឡើង ដោយគ្រោងចាក់បញ្ចាំងជាលើកដំបូងក្នុងឆ្នាំ2022 ផងដែរ។​

2.ការតាំងពិព័រណ៍ Manga ជប៉ុន ឆ្នាំ 2022

Manga Exhibition

“ការតាំងពិព័រណ៍ Manga ជប៉ុន​ ឆ្នាំ 2022” មានគោលបំណងលើកកម្ពស់វប្បធម៌នៃការអាន តាមរយៈការអានសៀវភៅ Manga នៅកម្ពុជា។ ព្រឹត្តិការណ៍នេះផ្តល់នូវខ្លឹមសារផ្សេងៗតាមរយៈកម្មវិធីជាច្រើនដូចជា៖ កម្មវិធីតាំងពិព័រណ៍ Manga ជប៉ុនកិច្ចសន្ទនា កម្មវិធីសម្តែង​ Cosplay និង កម្មវិធីលេងល្បែងកំសាន្តបែបជប៉ុន។

កម្មវិធីទាំងអស់នោះនឹងឆ្លុះបញ្ចាំងឲ្យយើងដឹង និងស្វែងយល់បន្ថែមអំពីប្រទេសជប៉ុនតាមរយៈការអានសៀវភៅ Manga ភាពខុសប្លែកគ្នារវាងភាសាជប៉ុនក្នុងសៀវភៅសិក្សា និងភាសាជប៉ុនក្នុងសៀវភៅ Manga ជំនួយដល់សិស្សានុសិស្សដែលកំពុងរៀនភាសាជប៉ុនលើជំនាញអាន និងនិយាយ តាមរយៈការអានសៀវភៅ Manga​ ជាដើម។ ហើយយើងសង្ឃឹមយ៉ាងមុតមាំថាប្រជាជនកម្ពុជា នឹងយល់ដឹងកាន់តែច្រើនអំពីសៀវភៅ Manga ដោយជ្រើសរើសសៀវភៅ Manga ជាមធ្យោបាយដើម្បីចាប់ផ្តើមទម្លាប់នៃការអាន។

“ការតាំងពិព័រណ៍ Manga ជប៉ុន ឆ្នាំ 2022”​​ នេះ នឹងក្លាយជាព្រឹត្តិការណ៍ប្រវត្តិសាស្ត្រ នៃការតាំងពិព័រណ៍ Manga ជប៉ុន ដំបូងគេបង្អស់នៅកម្ពុជា សម្រាប់យុវជនកម្ពុជា ជាពិសេសសម្រាប់អ្នកសិក្សាភាសាជប៉ុន និងអ្នកស្រឡាញ់ Manga ផងដែរ។